睇人爆機拎彩蛋

舊時 (音史) 冇咁多人屋企有遊戲機。小學雞會孖個同學仔去租機打。最初玩紅白機，之後係世嘉五代、超任。澳門嘅荷蘭園馬路近新西洋墳場，三盞燈三勝新邨，望廈龍園嘅租機舖都有去過，不過唔係我租，純粹跟同學去，睇人打機。雖然唔係自己打，但睇人打都好刺激。睇到同學爆機都會一齊興奮大叫。

今日終於去睇《挑戰者一號》(Ready Player One)。史匹堡嘅戲，中途點死人冧樓都好，結局合家歡就預咗㗎喇。 (真係可以照字面理解，死人兼冧樓) 但係奸角嘅結局好耐人尋味。眼中只有錢，從來冇享受過虛擬遊戲「綠洲」嘅奸角，為咗阻止男主角攞到綠洲嘅彩蛋，連人都敢殺。但最後，手槍對住主角隨時可以殺人嗰一刻，正正係男主解開所有迷團，捧住彩蛋嘅一刻，奸角猶疑了。嗰種目瞪口呆，就好似一個成世人淨係識讀書，從來冇打過機嘅細路，今日忽然遇到人哋打機。唔只係咁咦睇，仲睇到人哋同final boss對戰，贏埋；睇埋爆機畫面，睇埋彩蛋。呢種衝擊、感動，恐怕係成長於80年代，睇慣同學仔租機打嘅人最能體會。

---

Download Steemia app from Google Play.